GURIT ING CEPLIK

WUS DAK TEMU SUWENGMU

wus dak temu suwengmu
bebandhul mata barleyan, mung sasisih
wus luwih sewindu, sliramu sulaya wegah ngakoni
wus dak temu suwengmu, mung sasisih
tansah mbandul atiku, ontang-anting rasaku
mung sawiji pindha sewu gunung nindhih ragaku

Bojonegoro, 22/06/2016
#siswonw.

SINAU SAKING MEDSOS

kenging punapa tiyang kedah nesu sanalika
adu arep kalayan kejujuranipun piyambak
lan enggal ngubur sajero-jeronipun
kadidene bathang ingkang paling laknat

Bojonegoro, 19/06/2016

#siswonw

GURIT WEWATON

Wewaton ing ngaurip lir kadya sing kaguru
pranyata mung sumarah sanyata
emba iliring baita pun rerata
soroh tan bisa ngendhani mala
Sumilak tuking cubriya kang kagiri-giri
lirnya wewayang kang anggegawang
wus sumurup mring telenging segara
tanpa kapalang mega lan wewaton

Bojonegoro, 18/06/2016
#siswonw.



ING LELAYONMU

Saumpama bisa
wanci wingi tak puter bali
umpama kuwawa tak cipta wujudmu
ora bakal luh iki tumetes ing layonmu

Siswo Nurwahyudi

19 Juni 2016