GURIT-GURIT ING WATON

GURIT WEWATON


Wewaton ing ngaurip lir kadya sing kaguru
pranyata mung sumarah sanyata
emba iliring baita pun rerata
soroh tan bisa ngendhani mala
Sumilak tuking cubriya kang kagiri-giri
lirnya wewayang kang anggegawang
wus sumurup mring telenging segara
tanpa kapalang mega lan wewaton

Bojonegoro, 18/06/2016
#‎siswo nw.

 ______________________________________________________________


ING LELAYONMU

Saumpama bisa
wanci wingi tak puter bali
umpama kuwawa tak cipta wujudmu
ora bakal luh iki tumetes ing layonmu


Bojonegoro, 19/06/2016
#‎siswo nw.

  ______________________________________________________________

ING SAWIJINING WENGI WAYAH PURNAMASIDI


Lamun lakuku bisa ngambah lurung pikirmu
lan lelangen ing ilining getihmu
bakal kelakon grenjetku
kababar paripurna
jroning impenmu


Bojonegoro, 22/06/2016
#‎siswo nw.

  ______________________________________________________________

WUS DAK TEMU SUWENGMU


wus dak temu suwengmu
bebandhul mata barleyan, mung sasisih
wus luwih sewindu, sliramu sulaya wegah ngakoni
wus dak temu suwengmu, mung sasisih
tansah mbandul atiku, ontang-anting rasaku
mung sawiji pindha sewu gunung nindhih ragaku


Bojonegoro, 22/06/2016
#‎siswo nw.